Куран айдыҥ 7-чи кӱнинде Оҥдой јурт тӧзӧлгӧнинеҥ ала 390 јылдыгын темдектеген. Ого учурлай аймактыҥ тӧс јуртында байрамдык керек-јарактар ӧткӧн.
Ончо неме он саат эртен тура, јуртка кирер јолдыҥ јанында јаҥыртылган стелланыҥ ачылтазынаҥ башталган. Оны ээчий Набережный оромдо балдар ойноор площадканыҥ ачылтазы ӧткӧн. Јурттыҥ «Сартакпай» стадионында улалган байрамга келген эл-јонго уткуулду сӧстӧрин Оҥдойдыҥ јурт јеезезиниҥ јааны Эзендей Тепуков, Оҥдой аймактыҥ јааны Мирон Бабаев, Алтай Республиканыҥ Государственный Јууны – Эл Курултайдыҥ Председатели Иван Белеков ло оноҥ до ӧскӧ улус айткандар.
Стадиондо јурттыҥ микрорайондоры ортодо «Сӱӱнчилӱ старттар», аймактыҥ артисттериниҥ ойын-концерти, алтай кӱрешле маргаандар ӧткӧн.
Јуулган улусты будыктардыҥ фестивали, јарлу јерлежис Эмиль Толкочековтыҥ ойын-концерти сӱӱндирген. Фейерверкле тӱгенген бу байрам ончо улуска јараган, кӱӱн-санааларын кӧдӱрген. Мыныҥ ӱстине ай-кӱн де јакшы турган.
Оҥдой јурт 1626 јылда тӧзӧлгӧн болуп јат. 1860 јылда анда баштапкы школ ачылган, 1881 јылда ол школдыҥ туразы тудулган. 1910 јылда јуртта 800-ке јуук кижи јуртаган.
Анда јайалталу, иштеҥкей, тӧрӧл јерин сӱӱп, оныҥ ӧзӱмине иштеп турган улус јуртайт. Албатыбыстыҥ сӱӱген Эл-Ойын байрамы да Оҥдойдоҥ башталган эмей. Јурттыҥ да, аймактыҥ да кӧп тоолу јайалталу улузыла јаҥыс ла республикабыс эмес, је анайда ок орооныс та оморкойт деп айдарга јараар.