Кызыл-Ӧзӧктиҥ орто текшиӱредӱлӱ школыныҥ 6-чы «Б» клазыныҥ ӱренеечизи Арина Гуляева «Мениҥ кичӱ Тӧрӧлим» деп адалган јайаан иштердиҥ текшироссиялык конкурсыныҥ јеҥӱчилдериниҥ бирӱзи боло берди.  
Бу конкурсты Россияныҥ јурт јердеги јашӧскӱриминиҥ бирлиги, Россия Федерациязыныҥ јуртээлем министерствозыныҥ јӧмӧлтӧзиле, быјыл јетинчи катап ӧткӱрген.
Алтай Республиканыҥ јуртээлем министерствозыныҥ пресс-службазыныҥ јетиргениле, конкурс телкем Тӧрӧлистиҥ, чыккан-ӧскӧн јери, оныҥ тӱӱкизи, ада-ӧбӧкӧзи, тӧрӧл јериниҥ ӧзӱми учун иштеген улус керегинде айдарга кӱӱнзеген, эл-јонын бириктирет. Конкурста бастыра 1300-ке јуук јайаан иштер аткарылган эмтир. Јеҥӱчилдерди јети номинация аайынча талдагандар. Тӧрӧл јурты керегинде бичиген Арина Гуляева «Деремнем кандый болзын деп кӱӱнзеер эдим» номинацияда јеҥӱчилдердиҥ тоозына кирген.
Конкурстыҥ јеҥӱчилдерин Калужский областьта ӧткӧн «Јуртка бӱдедис! Россияла оморкойдыс!» деп адалган III Бастырароссиялык јайаан фестиваль ӧйинде кайралдагандар. Бу фестивальга орооныстыҥ 30 кире тергеезинеҥ ӧрӧ адалган конкурстыҥ 200-ке јуук туружаачызы келген эмтир.