Горно-Алтайсктыҥ Государственный университеди бакалавриаттыҥ программазы аайынча бюджетный јерлерге студенттер алар иштиҥ турулталарын кӧрӱп тура, быјыл абитуриенттердиҥ тоозы мынаҥ озо јылдарга кӧрӧ кӧп болгонын темдектеген. ГАГУ-ныҥ пресс-службазыныҥ јетиргениле, бастыра 2358 угузу алынган, мынызы ӧткӧн јылдыҥ кӧргӱзӱзине кӧрӧ 512-ге кӧп болуп јат.
Бакалавриаттыҥ ла специалитеттиҥ программалары аайынча очный ла очно-заочный бӱдӱмдӱ ӱредӱниҥ бюджетный јерлерине алар иш ороонныҥ ончо вузтарында куран айдыҥ 3-8 кӱндеринде ӧткӧн. Мындый ок иш ГАГУ-да ӧткӧн лӧ бюджетный 358 јердиҥ бастыразы толо берген. Специалисттердиҥ темдектегениле, абитуриенттер вузта бар специальностьтордыҥ ла ууламјылардыҥ ончозыла јилбиркеген. Текши алар болзо, университетте бакалавриаттыҥ ла специалитеттиҥ программалары аайынча бир бюджетный јерге 6,6 кижидеҥ келишкен. Ууламјылар аайынча алар болзо, «Юриспруденцияда» бир јерге 21 кижидеҥ, «Экономикада» - 16, «Социологияда – 14», «Туризмде» - 12, «Социальный иште» -12, «Тӱӱкиде» - 10 кижидеҥ келишкен.  
Бу ок ӧйдӧ вузтыҥ ӱредӱге алар камызы ӱредӱге алар иштиҥ уч-турулталарын кӧрӧргӧ арай эрте болгонын темдектейт. Не дезе, акча тӧлӧп ӱренер јерлерге алар иш улалганча. Оныҥ турулталары кучӱрген айдыҥ сыраҥай ла учында јарталар.